O ATENEO

Cando o ano 1952 está esgotando os seus días, un grupo de intelectuais e profesionais marinenses xúntanse o 22 de novembro, día de Santa Cecilia (Patroa dos músicos), e acordan crear unha nova asociación.

O fin principal, ademais de servir de acubillo ás manifestacións musicais, era a difusión e promoción da cultura en cada unha das súas vertentes: artísticas, intelectuais, patrimoniais e de conservación das tradicións. Tiña tamén o obxectivo de formar ás novas xeracións de marinenses en disciplinas como a música, o debuxo e a pintura, entre outras. Das aulas do Ateneo xurdiron grandes artistas e profesionais que acadaron gran sona e prestixio.

Cunha traxectoria de máis de sete décadas como referente cultural non só en Marín, senón tamén fóra das nosas fronteiras, o Ateneo Santa Cecilia é testemuña do paso polas súas instalacións de profesionais e artistas ilustres, que ofreceron as súas mellores obras, achegándonos aos temas máis interesantes ou de actualidade.